आभै सू बूंद पड़ी
लागी सावण री झड़ी।
नैणां री फड़कण
हिवड़ै री धड़कण
मनड़ै रौ तड़पण
सरमाती लजवण
देखै है दरपण
नैणां में आय ढळी
आ भै सूं बूंद पड़ी
लागी सावण री झड़ी।
निरखै है दिनकर
बादळ री ओट्यां
मनड़ै रा मिणिया
मुळकै है गोद्यां
अंगिया री टूक्यां
सांचै गौटै सूं जड़ी
आ भै सूं बूंद पड़ी
लागी सावण री झड़ी
बिछियां री पकड़ण
नेवर री टणमण
चुड़लै री खणखण
रखड़ी री पळकण
नथड़ी लटकण
होठां पर आय पड़ी
आभै सूं बूंद पड़ी
लागी सावण री झड़ी।
सूरजियौ छिपसी
चांदड़लौ हंससी
तारां री खिंवण
चौबरियौ खिलसी
सांझडली खिलसी
रातड़ री ओढ़ चूंनड़ी
आ भै सूं बूंद पड़ी
लागी सावण री झड़ी।
तनड़ै रो दीपक
मनड़ै री बाती
झीणौ घूंघटियौ
आंखड़ल्यां राती
मेड़्या री थळियां
दिवलौ चासण नैं खड़ी
आ भै सूं बूंद पडी
लागी सावण री झड़ी।
