धिन आखर धिन सै सबद, धिन कविता धिन छंद।
धिन धिन मायड़ मुरधरा, धिन रितुआं रा कंद॥
धिन बोल्यां धिन जीभड़ी, धिन रतनां री खान।
धिन धिन मेळा मांडणा, धिन बाल्हा जजमान॥
धिन सिंझ्या धिन चानणी, धिन मावस री रात।
धिन धिन जुपता आगिया, धिन धिन सीळी वात॥
धिन लिछमी धिन रोकड़ा, धिन बैमाता लेख।
धिन धिन इंदरधनख’ई, धिन आभा री रेख॥
धिन गाडी धिन गाडलो, धिन खांडा री धार।
धिन धिन अणहद ओपतो, धिन धिन सातूं वार॥
धिन दिवलो धिन रातड़ी, धिन गारो धिन चाक।
धिन धिन तुलती ताकड़ी, धिन धोरां रो आक॥
धिन जोधा धिन जोगिया, धिन धिन आठूं पौर।
धिन ओळख धिन रामजी, धिन तीजां गणगौर॥
धिन आंख्यां धिन प्रीतड़ी, धिन तारांळी रात।
धिन धिन लाखीणा पुसब, धिन उगती परभात॥
धिन थोबा धिन ओक’ई, धिन दांमण धिन दोड़।
धिन धिन बैरां बोरड़ी, धिन भायां री जोड़॥
धिन पणिहारी गीतड़ा, धिन गायक धिन राग।
धिन धिन तकली कातणो, धिन आदू बैराग॥
धिन पाथळ धिन भौमिया, धिन चेतक चित्तौड़।
धिन धिन रातीघाटियां, धिन रणखेतां ठौड़॥
धिन जीवण धिन जेवड़ी, धिन काया रो सांस।
धिन धिन माळी बाड़ियां, धिन सेवण धिन बांस॥
धिन माथो धिन बेवड़ो, धिन बेरा धिन नीर।
धिन धिन कोसां जावणो, धिन नणदी रो बीर॥
धिन घट्टी धिन गूजरी, धिन ढाढ़ी धिन जाट।
धिन धिन रजपूतां थळी, धिन चारण रो पाट॥
धिन धरती धिन देवता, धिन लूंठो आकास।
धिन धिन धोरां मानवी, धिन धोरां अरदास॥
धिन आडावळ सूरमो, धिन चामळ री धार।
धिन धिन ऊंचा टीबड़ा, धिन टीबां री गार॥
धिन मिमझर धिन खेजड़ा, धिन सेवण रा बाग।
धिन धिन भूंतो बायरो, धिन बथुआ रो साग॥
धिन ओरण धिन देवरा, धिन सूरज रो तेज।
धिन धिन खेड़ा ढाणियां, धिन झूंपा रो हेज॥
धिन ओठी धिन भीतड़ा, धिन रणखेतां ढोल।
धिन धिन धरमी गोखड़ा, धिन बाळदिया बोल॥
धिन चिरमी धिन चैखळा, धिन चैसर धिन चौथ।
धिन धिन लटकण लोटड़ी, धिन आटै री लोथ॥
धिन रावण धिन रामजी, धिन आंख्यां रो चास।
धिन बगड़ावत जैमती, धिन साढ़ू मां आस॥
धिन गोफण धिन कांकरो, धिन तीतर धिन पांख।
धिन तरगस धिन तीर’ई, धिन मछली री आंख॥
धिन गेंती धिन तासलो, धिन पूरबियो देस।
धिन धिन पिछवाई भली, धिन दाळद दरवेस॥
धिन सुरसत धिन सांथियो, धिन नाजां भंडार।
धिन धिन बचनां पारखू, धिन मरणौ इधकार॥
धिन कावड़ धिन केवड़ो, धिन तन्नोटी मात।
धिन धिन सरहद सूरमा, धिन सांगा रो गात॥
धिन पोथ्यां धिन पानड़ा, धिन पगरस धिन पाग।
धिन धिन पीपल परणियो, धिन भौजायां भाग॥
धिन जौहर धिन जोतसी, धिन जबरा जुझार।
धिन धिन केसरियो बलम, धिन लूआंळी थार॥
धिन मारग धिन मानवी, धिन मजलां धिन कूख।
धिन धिन बारामास’ई, धिन आंतड़ियां भूख॥
धिन आंधी धिन रेतड़ी, धिन रावळयिा राज।
धिन धिन डाळ कमेड़ियां, धिन चीड़ी धिन बाज॥
धिन बुगचो धिन बांधणी, धिन मीठी मनवार।
धिन धिन माथै बोरलो, धिन सोळा सिणगार॥
धिन तुलसी धिन तूंतड़ा, धिन हाळी धिन बीज।
धिन धिन खेती काळ’री, धिन जीवण तजबीज॥
धिन मरवण धिन पदमणी, धिन मीरां धिन धाय।
धिन धिन कुळ री देवियां, धिन मुरधर री लाय॥
धिन लूआं धिन बायरो, धिन भाटा धिन रेत।
धिन धिन मोभी सांवरो, धिन हिवड़ा रो हेत॥
धिन चिल्हा धिन नारिया, धिन बळदां रा टोळ।
धिन धिन ओठी पाहुणा, धिन देवां रा डोळ॥
धिन बाबल धिन डीकरी, धिन मांडो धिन जान।
धिन धिन गीतां ओवरी, धिन बाखळ रो ग्यान॥
धिन बिरखा धिन नाडिया, धिन पाणी धिन पाळ।
धिन धिन बीजळ बेलड़ी, धिन सुरगां री नाळ॥
धिन डूंगर धिन अरबुदो, धिन जैसाणो गांव।
धिन धिन जैपुर पाटवी, धिन बीकाणी छांव॥
धिन गायां धिन बाछड़ा, धिन रेवड़ धिन ग्वाळ।
धिन धिन बीजळ बेलड़ी, धिन सुरगां री नाळ॥
धिन तेजो धिन रामदे, धिन पाबू धिन पीर।
धिन धिन जोधाणो जबर, धिन नागोरण हीर॥
धिन महुओ धिन कैरिया, धिन आंबो धिन खींप।
धिन धिन सरसों फूलड़ा, धिन मुरधर री सींप॥
धिन गोखा धिन गोरमा, धिन कांकड़ धिन थान।
धिन धिन हांडी झेरणा, धिन बाल्हो रजथान॥
धिन करसा धिन खेतड़ा, धिन बादळ धिन मेह।
धिन धिन लुळतो बाजरो, धिन करसण री देह॥
