आजकाल सैंसार में, मोबायल वरदान।
गांव सै'र घर खेत में, बण्यो मिनख री जान॥
मोबायल म्हेमां घणीं, झाल्यां राखै हाथ।
जग सूं जोड़ै मिनख नै, बुरै टैम में साथ॥
ले मोबायल हाथ में, जोड़ लियो सैंसार।
बिन्या तार री जुगत सूं, जुड़ग्या मन रा तार॥
मोबायल सैंसार में, घणों निराळो रोग।
पासै बैठै मिनख सूं, बोलै कोनी लोग॥
मोबायल रै कारणै, भूल्या घर पिरवार।
खाणों पीणों भूलग्या, भूल गिया रूजगार॥
सोच समझ सूं बरत ल्यो, मोबायल औतार।
नासमझी सूं बरतियां, कद देवै बेकार॥
मोबायल मूंघो घणों, मूंघो मिनखां टैम।
घणों चलावै मानखो, बिसर गयो नित नैम॥
