ताल हीन इक दूसरो, तान हीन पहिचांन।
तीजो कहियतु काक सुर, अपर भंग सुर जान॥
बांके भौंह ग्रीवा वदन करन पंचमो एह।
छठये ज्यों गावत तबै, अधिक डुलावत देह॥
कहत सातमों भेद सुर, बिन जाने गावंत।
अष्ट कपाली सुरन ही, सुधरन चित भावंत॥
ए दस वरने राग के, प्रकट दीख मतिसार।
इनहिं त्यागि गावत गुनी, तो रीझै सिरदार॥
कहत सपत सुर राग गुन, अरु उतपत के देव।
अब आगै वरनत सुघर, राग-रागिनी भेद॥
राग कहै खट राग है, त्यै ही तीस प्रमांन।
राग राग प्रति पांच तिये, जानत जान सुजांन॥
गात वरन तन वसन रितु, भूपन रूप सुभाय।
हाव भाव सुर जाति सौं रागिनी तीस गिनाय॥
राग सिरोमन प्रथम है, भैरव संकर रूप।
बरनत सो सिरदार है, सुनौ सुपंडित भूप॥
