मैं दीठा जादम जेसलमेर।
पुराणा खालड़ बांधै पूठ।
अणूता चूचा हांकै ऊंठ।
मदासर पासै धोळा माळ।
दुरब्बळ भाटी देस दुकाळ।
हुँचेरा तालर आवै हैर।
मैं दीठा जादम जेसलमेर॥
राती रिड़ थोहर मध्धम रूंख।
भमै दिगपाळ मरंता भूख।
टिकायत राणी गद्धा टोळ।
हेकली फवत नीर हिलोळ॥
मुलक्क मंझार न बोलै मोर।
जरक्खां, सेहां, गोहां जोर।
फाटोड़ी जाजम च्यारूं फेर।
घोडां ढिग लाख बुगां रा ढेर।
मैं दीठा जादम जेसलमेर॥
हैकै गढ ऊपर तीन हजार।
कोडीधज सक्कज साहूकार।
दिनां ही तेथ मरै दस-दस्स।
विणज्जै खांफण ले सरवस्स।
ढबूरो बारठ ढीली लांग।
टहक्कै दोनूं खोड़ी टांग।
गळयोड़ी जाजम, मझ्झ बगार।
जुड़ै जहं रावळ रो दरबार।
मैं दीठा जादम जेसलमेर॥
बुडाणा नाई तांजो बप्प।
असांजा भाव रखदां अप्प।
तवां को बारोबार तनाह।
मुलां हिक डोई छट्ट मनाह।
कनीनै गेडियै आडै कध।
बळद्धां जोतण राम न बध।
मैं दीठा जादम जेसलमेर॥
