दन-रात री सुई

बूढ़ी मांय, दानौ बाप

अपणी लाज नै ढांप

परदेस गयोड़ा भायां री

वाट जोवती खड़ी है जिनगाणी।

दर भर घाणी री लाट

पेट री दरजां नै पाट

उड़ता पंखेरू, भमता भंवरा ज्यूं

उजाळा रै सागै-सागै,

परवान चढ़ी जिनगाणी।

टूटया विस्वास बंधाती

रिक्सा रै अगला अर पाछला

पैड़ां रै बीच बंधी चैन-सी

नुवां जोस-खरोस सूं

बायरा सूं बातां करती

छितिज नै छुवणै बढ़ी है जिनगाणी

छितिज नै परसणै बढ़ी है जिनगाणी।

स्रोत
  • पोथी : आंगणै सूं आभौ ,
  • सिरजक : कमला जैन ,
  • प्रकाशक : उषा पब्लिशिंग हाउस ,
  • संस्करण : प्रथम
जुड़्योड़ा विसै